2Ti 4 | PWG | STEP | Yesu Keriso tuna mara damonai ina nekiibau da ini kiivavo na wawaya raborabobosi ma yawayawasisi ini tupaviresi. Yesu Keriso ma God maghinosiyai kam sisiya bagibagina ana terei na weni.

a 4:10Kol 4:14; Prm 24; 2Kor 8:23; Gar 2:3; Tait 1:4

b 4:11Kol 4:14; Prm 24; Apos 12:12, 25, 13:13, 15:37-39; Kol 4:10

c 4:12Apos 20:4; Epe 6:21-22; Kol 4:7-8

d 4:13Apos 20:6

e 4:141Tim 1:20; Psa 62:12; Rom 2:6

f 4:19Apos 18:2; 2Tim 1:16-17

g 4:20Apos 19:22; Rom 16:23; Apos 20:4, 21:29

2 Timothy 4

1 Yesu Keriso tuna mara damonai ina nekiibau da ini kiivavo na wawaya raborabobosi ma yawayawasisi ini tupaviresi. Yesu Keriso ma God maghinosiyai kam sisiya bagibagina ana terei na weni. 2 Tam, God vonana kedimei. Kevovunagha bubuna da namanaki mara berona bo mara biibiina ma kedima. Wawaya ketupavimanimaninisi, keyeghisi, kekiiepepisi da i nota ini rewapana ma nuwapikamuwai kevi beyebeyena, 3 iyamna mara epipisi da wawaya vibeyebeyena vaghata ina barei ma i kayowana ghamana da vibeyebeyena wapawapa wawayisi ina kiividaburisi da ti mani tinisiyai ini yanesi. 4 Vonavaghata ina takuputei ma nuwanuwasi kudubinai i kiki berasi ini tumaghanei. 5 Ma tam, mara nonowa kemiirikikina, vokwarakwara kamonai am nota ini rewapana, God vonana biibiina kedimei ma am biga God kubiine kudubina kebera yavui.

6 Ma taku na namada aku mara itupo da ani suwara, aku mara ipisi da ana nae, ana rabobo. 7 Taku averau da averu bubuna, aku vitumaghana ma aku vonakiiyapa bagibagina avotana bubuni ma amiirikikina, apisi da karako damona. 8 Ma wekarakava na God kaku kraun ivovunaghi emakamakai. Ma karakava mara damonai Bada ina vereku, ini matakira da abiga bubuna. Nani maranai Bada vonavaghata tepanai wawaya ini tupaviresi ma ina vonakiiyaragha da biibiisi bo beroberosi. Ma ke taku kava kraun ina vereku ma bade iyavo kava nimonimoriyai ikoyakoyagha da Yesu ina vovira na ti damsi yavata.

Pol ina yawasa ivi sisiyei.

9 Nuwanuwam kudubinai kebera tovoni da yaghiyaghinai kuna pisi kuriku, 10 iyamna Demas ivotereku, dobu yawasina ivi nuwaviini da inae ku Tesalonika kwanatuna. Ma Kresen inae ku Gareisiya dobuna ma Taitos inae ku Darumesiya dobuna. ^a 11 Luk ina kina kava gwabikuwai. Mak kerutini ma yavata kopisi, iyamna tuna ibiibii kirakai, ina bige bubuniku. ^b 12 Ma Taikikas avonatawei ku Epesas kwanatuna. ^c 13 Kuna pipisi na kaku nuba garana Kapas gwabinai kekavari, Troas kwanatunai akuyowei. Ma aku buka peyarina kekavari ma kekita bubuna da nani bukasi ghamoghamo bekasiyai iyamoni na ti yavata kekavari. ^d

14 Ariksanda, tuna ina biga da kirama egudagudai da sawara eyamoyamona. Nani tomowina ikiivibero kirakiiyeku, ina berabero kubiine Bada kovogha ina verei. ^e 15 Nani wawayina kekitaruvai, ighevuvurana kirakai ma mara nonowa evonavona da ita sisiya na vibero.

16 Karena vaghata Rome damsi ivi tupavireku na taku mani kaku papara avowai iyamna ke sago iyai iti viteku da kubiiku iti sisiya, peyarisi ikuyoweku. God kurina ainowi da i berabero ina notatawei ma kovogha ke ina veresi. 17 Ma Bada ke ita kuyoweku, ivi viteku ma rewapana ivereku da kupuna damsi kurisi God varana biibiina kudubina adimei. Wawaya iti raboboku, kaku kovogha na layon ita kutapiiniku ma kegha da God ivi yawasiku. 18 Ma aviyavisina berona kuriku ina tuputupuwa na Bada ini yawasiku ma ina viiniku da ina vikiivavona makamakii nonowina ku kamona ina tereku. Tuna kurina mara nonowa tavokavakavara da kana kadara ina rakata! Amen.

Vikiikiiwa damona.

19 Pirisera ma Akwila ma bade Onesiporas ina rakaraka yavata aikiikiiwesi. ^f 20 Erastas na Korint kwanatunai emakamakai. Ma Toropimas igubaga kubiine na Miletas kwanatunai akuyowei. ^g 21 Kebera tovoni da kuna pisi ma muriyai da nuba kana mara.

Yubulas, Pudens, Linas, Korodiya ma Keresiyana varevaresita kudubisi ikiikiiwem.

22 Ainowi da Bada kanumim ini biibiini.

Ma bade ainowi God kurina da ina agabiibai peyarimi gwabimiyai ina makai.